Zepto અને Amul કંપનીમાં ઓનલાઇન ફરિયાદ કરી : પરિણામ શૂન્ય
મુંબઈ
આજકાલ જે રીતે FDA દ્વારા હોટેલ રેસ્ટોરન્ટ અને અન્ય સ્થળો પર ક્વોલિટી સ્વચ્છતા માટે રેઇડ પાડવામાં આવે છે પરંતુ ઓનલાઇન ફૂડ અને અન્ય સામગ્રી મંગાવનારાઓએ પણ ચેતવું પડે તેવી ઘટના બની છે. મીરારોડ કનકિયા વિસ્તારમાં રહેતી તન્વી કક્ક્ડે ૭ સપ્ટેમ્બરે બપોરે zepto પર ઓનલાઇન અમુલ બટર મંગાવ્યું હતું. જ્યારે તેણીએ અમુલ બટરનું પેક ખોલ્યું, ત્યારે બટરની અંદર પ્લાસ્ટિક અથવા રેપર જેવી સામગ્રીના ઘણા લાલ રંગના નાના ટુકડા જોવા મળ્યા. જે જોઈ તેને આઘાત લાગ્યો. તન્વીએ તરત જ પુરાવા તરીકે તેનો વીડિયો રેકોર્ડ કર્યો. તેણીએ Zepto પાસે ફરિયાદ નોંધાવી હતી, પરંતુ દુર્ભાગ્યે, તેમના તરફથી પણ કોઈ યોગ્ય પ્રતિસાદ મળ્યો નહીં.
ત્યાર બાદ તેણીએ અમૂલની ઈમેલ ચેનલ દ્વારા સંપર્ક કર્યો અને વીડિયો શેર કર્યો. જ્યારે તેમ છતાં કોઈ જવાબ ન મળ્યો, તન્વીએ અમૂલની હેલ્પલાઇન પર ફોન કર્યો. તેણીને જણાવવામાં આવ્યું કે તમારી ફરિયાદ P26063410 નોંધાઈ ગઈ છે અને ૩ દિવસની અંદર અમૂલ તરફથી તમને વળતો ફોન કોલ આવશે.જો કે હજુ પણ તેને કોઈ કોલ આવ્યો નથી.
તન્વીએ જણાવ્યું કે આ બાબત અત્યંત નિરાશાજનક છે, ખાસ કરીને અમૂલ જેવી બ્રાન્ડ તરફથી, જેના પર ભારતીય પરિવારો દાયકાઓથી વિશ્વાસ કરતા આવ્યા છે. અમે વર્ષોથી અમૂલનું દૂધ, બટર, ચીઝ, દહીં અને અન્ય ઉત્પાદનોનો ઉપયોગ કરી રહ્યા છીએ, અને આવી ઘટનાની મેં ક્યારેય અપેક્ષા રાખી ન હતી. આ માત્ર ખામીયુક્ત ઉત્પાદનનો મામલો નથી. આ ખાદ્ય સુરક્ષા અને ગ્રાહક સુરક્ષાનો મુદ્દો છે.
તન્વીએ fda કમિશનર તુકારામ મુંડેને વિનંતી કરી છે કે તેઓ કૃપા કરીને આ બાબતની તપાસ કરે અને યોગ્ય પગલાં ભરે.
તન્વી ઈચ્છે છે કે સંબંધિત સત્તાવાળાઓ અને અમૂલ આ ઉત્પાદનની યોગ્ય તપાસ કરે, આ કેવી રીતે બન્યું તે શોધી કાઢે અને સ્પષ્ટ ખુલાસો આપે. અન્ય થા તન્વી ગ્રાહકસુરક્ષા કાયદા હેઠળ zepto અને Amul સામે કાયદાકીય લડત આપવા સજ્જ છે.
