મુંબઈમાં તાજેતરમાં રોમેન્ટિક ફિલ્મ ‘દિલ દીવાના હો ગયા’નું પ્રમો અને મ્યુઝિક લોન્ચ યોજાયું, જેમાં ફિલ્મની સ્ટારકાસ્ટ અને સમગ્ર ટીમ હાજર રહી હતી. નિર્દેશક રાજીવ શામલાલ સોનીની આ ફિલ્મ 31 જુલાઈ, 2026ના રોજ દેશભરના સિનેમાઘરોમાં રિલીઝ થવાની છે.
ગ્રાન્ડવે પ્રોડક્શન્સના બેનર હેઠળ બનેલી આ ફિલ્મ દ્વારા લોકપ્રિય ટેલિવિઝન અભિનેત્રી કાજલ ચૌહાણ બોલિવૂડમાં ડેબ્યૂ કરી રહી છે. તેમની સાથે ભાનુજ સૂદ અને શુભકરણ ભોપાલ પણ મુખ્ય ભૂમિકામાં જોવા મળશે. આ બંને કલાકારો માટે પણ આ પ્રથમ ફિલ્મ છે. કાર્યક્રમ દરમિયાન ફિલ્મના ગીતોની ઝલક રજૂ કરવામાં આવી હતી, જેને ઉપસ્થિત મહેમાનો તરફથી સારો પ્રતિસાદ મળ્યો.
ફિલ્મના નિર્માતા ઇશ્પોલ સિંહ ચાવલા, જે લુધિયાણા (પંજાબ)ના રહેવાસી છે, તેમણે ફિલ્મના નિર્માણ માટે નિર્દેશક રાજીવ શામલાલ સોની પર સંપૂર્ણ વિશ્વાસ વ્યક્ત કર્યો હતો. ફિલ્મ સાથે જોડાયેલી એક રસપ્રદ બાબત એ પણ સામે આવી કે ફિલ્મનું સમગ્ર શૂટિંગ પૂર્ણ થવા સુધી નિર્માતા અને નિર્દેશકની રૂબરૂ મુલાકાત થઈ નહોતી, છતાં ફિલ્મ સફળતાપૂર્વક પૂર્ણ થઈ હવે રિલીઝ માટે તૈયાર છે.
નિર્દેશક રાજીવ શામલાલ સોનીએ જણાવ્યું કે ‘દિલ દીવાના હો ગયા’ એક રોમેન્ટિક ફેમિલી ડ્રામા છે, જેનું શૂટિંગ મુંબઈ અને મનાલીમાં કરવામાં આવ્યું છે. તેમના જણાવ્યા મુજબ ફિલ્મની વાર્તા પ્રેમ, લાગણીઓ અને સંબંધો પર આધારિત છે. એક યુવાન જે યુવતીને પ્રેમ કરે છે, તે યુવતી કોઈ બીજા વ્યક્તિને પ્રેમ કરતી હોય છે. અંતે તે કોની પસંદગી કરે છે, તે ફિલ્મનો મુખ્ય આકર્ષણ રહેશે. તેમણે ઉમેર્યું કે ફિલ્મનું સંગીત દર્શકોને 90ના દાયકાના મધુર ગીતોની યાદ અપાવશે.
કાજલ ચૌહાણે જણાવ્યું કે ટેલિવિઝનથી ફિલ્મો સુધીનો તેમનો સફર પડકારજનક રહ્યો છે, પરંતુ આ ફિલ્મમાં મળેલી ભૂમિકાથી તેઓ ખૂબ ખુશ છે. તેમણે નિર્માતા અને નિર્દેશકનો આભાર વ્યક્ત કરતાં કહ્યું કે આ એવી ફિલ્મ છે, જેને આખો પરિવાર સાથે બેસીને માણી શકે.
ભાનુજ સૂદે પોતાની પ્રથમ ફિલ્મને કારકિર્દી માટે મહત્વપૂર્ણ તક ગણાવી, જ્યારે મનાલીના રહેવાસી શુભકરણ ભોપાલે પોતાના જ શહેરમાં શૂટિંગ કરવાનો અનુભવ યાદગાર ગણાવ્યો.
ફિલ્મમાં બ્રિજ ગોપાલ, રાજુ ખેર, મહુલ બુચ, મુશ્તાક ખાન, ગરિમા અગ્રવાલ, અરુણ બક્ષી, અંજલી ગુપ્તા અને દિવ્યા દ્વિવેદી પણ મહત્વપૂર્ણ ભૂમિકામાં જોવા મળશે. કાર્યક્રમમાં સંગીતકાર વિષ્ણુ નારાયણ તેમજ ગાયક પામેલા જૈન અને યુ.વી. પણ ઉપસ્થિત રહ્યા હતા.
વરિષ્ઠ અભિનેતા મુશ્તાક ખાને જણાવ્યું કે તેમણે ફિલ્મમાં ડૉક્ટરની ભૂમિકા ભજવી છે અને નિર્દેશક રાજીવ શામલાલ સોની સાથે લાંબા સમયથી મિત્રતા છે. તેમણે વિશ્વાસ વ્યક્ત કર્યો કે ફિલ્મ દર્શકોને પસંદ આવશે.
અભિનેતા અને ગાયક અરુણ બક્ષીએ જણાવ્યું કે નિર્માતા પણ લુધિયાણાના હોવાથી તેમને ખાસ જોડાણનો અનુભવ થયો. તેમણે આખી ટીમ સાથે કામ કરવાનો અનુભવ યાદગાર ગણાવ્યો.
ફિલ્મનું ઓલ ઈન્ડિયા વિતરણ જે.બી. પિક્ચર્સ દ્વારા કરણ ભાટિયા કરી રહ્યા છે. ‘દિલ દીવાના હો ગયા’ હવે 31 જુલાઈ, 2026ના રોજ દેશભરના સિનેમાઘરોમાં દર્શકો સમક્ષ રજૂ થશે.
