દિલ્હી
ભારતીય નૌકાદળ અને રશિયન ફેડરેશન નેવી (RuFN) વચ્ચે 13 થી 18 ઓક્ટોબર 2026 દરમિયાન યોજાનારી દ્વિપક્ષીય નૌકાદળ કવાયત ‘ઇન્દ્ર-2026’માં ભાગ લેવા માટે ભારતીય નૌકાદળનું જહાજ INS સહ્યાદ્રી 10 ઓક્ટોબર 2026ના રોજ વ્લાદિવોસ્તોક પહોંચ્યું હતું.
આ તૈનાતી બંને નૌકાદળો વચ્ચે વ્યાવસાયિક જોડાણો અને ઓપરેશનલ (કાર્યાત્મક) આદાનપ્રદાન માટેની તક પૂરી પાડે છે, જેનાથી પરસ્પર સમજણ મજબૂત થાય છે અને દરિયાઈ સહયોગ તથા આંતર-કાર્યક્ષમતા (interoperability)માં વધારો થાય છે.
‘ઇન્દ્ર-2026’ કવાયતમાં ‘હાર્બર ફેઝ’ (બંદર પરના તબક્કા) દરમિયાનની પ્રવૃત્તિઓ અને ત્યારબાદ સમુદ્રમાં સંકલિત ઓપરેશનલ પ્રવૃત્તિઓનો સમાવેશ થશે. આ કવાયતમાં વ્યાવસાયિક આદાનપ્રદાન અને દરિયાઈ દાવપેચનો સમાવેશ થશે, જેનો ઉદ્દેશ્ય સહભાગી નૌકાદળો વચ્ચે ઓપરેશનલ સંકલન અને આંતર-કાર્યક્ષમતા વધારવાનો છે. સામાજિક અને સાંસ્કૃતિક કાર્યક્રમો પણ બંને નૌકાદળોના કર્મચારીઓને એકબીજા સાથે વાતચીત કરવાની તક પૂરી પાડશે, જેનાથી સૌહાર્દ અને લોકો-થી-લોકો વચ્ચેના સંબંધોને પ્રોત્સાહન મળશે.
INS સહ્યાદ્રીની સહભાગિતા ભારત સરકારના ‘મહાસાગર’ (MAHASAGAR) વિઝનને અનુરૂપ છે અને તે ભારત તથા રશિયા વચ્ચેની લાંબા સમયથી ચાલી આવતી સંરક્ષણ અને દરિયાઈ ભાગીદારીને વધુ મજબૂત બનાવે છે. આ તૈનાતી 04-05 ડિસેમ્બર 2025ના રોજ યોજાયેલી 23મી ભારત-રશિયા વાર્ષિક સમિટ દરમિયાન નિર્માણ પામેલી ગતિશીલતાને આગળ વધારવાની તક પણ પૂરી પાડે છે.
