મુંબઈના વડાલા વિસ્તારમાં ૪૮ વર્ષથી ન્યાય માટે લડી રહેલા એક પરિવારને અંતે બોમ્બે હાઈકોર્ટમાંથી મોટી રાહત મળી છે. કોર્ટે ૧૯૭૮થી પેન્ડિંગ રહેલા ફ્લેટ ટ્રાન્ઝેક્શનને પૂર્ણ કરવાનો આદેશ આપતાં ખરીદદારના વારસદારોને ન્યાય મળ્યો છે.
મુંબઈ પ્રતિનિધી મુજબ, મે ૧૯૭૮માં એમ. કે. માધવને પોતાની પુત્રી માટે વડાલા વિસ્તારમાં આશરે ૨૮૫ ચોરસ ફૂટનો ફ્લેટ ₹50,000માં ખરીદવાનો કરાર કર્યો હતો. તેમાંમાંથી ₹30,000 એડવાન્સ તરીકે ચૂકવાયા હતા, જ્યારે બાકી ₹20,000 પછી ચૂકવવાના હતા.
પરંતુ, ફ્લેટના મૂળ માલિક આર. સુબ્રમણ્યમે વ્યવહાર પૂર્ણ કરવા ઇનકાર કર્યો અને ફ્લેટનો કબજો આપવાનો ટાળ્યો. તેમણે ચૂકવેલી રકમ પરત આપવાનો પ્રયાસ કર્યો અને મિલકત પોતાને જ રાખવાનો પ્રયત્ન કર્યો.
આથી, કબજો ન મળતાં ખરીદદાર એમ. કે. માધવન ૧૯૮૨માં કોર્ટમાં ગયા. ત્યારબાદ કેસ વર્ષો સુધી પેન્ડિંગ રહ્યો. આ દરમિયાન, બંને પક્ષોના મૂળ વ્યક્તિઓનું અવસાન થયું અને તેમના વારસદારોએ કાનૂની લડત ચાલુ રાખી.
આખરે, બોમ્બે હાઈકોર્ટે મહત્વપૂર્ણ ચુકાદો આપતા વેચનાર આર. સુબ્રમણ્યમના વારસદારોને ફ્લેટનો વ્યવહાર પૂર્ણ કરીને કબજો સોંપવાનો આદેશ કર્યો. સાથે જ કોર્ટે સ્પષ્ટ કર્યું કે ખરીદદારના વારસદારો બાકી રહેલા ₹20,000 ચૂકવશે, જે આજના બજાર મૂલ્ય અનુસાર અંદાજે ₹25 લાખ જેટલા થાય છે.
આ કેસ દર્શાવે છે કે ન્યાય મેળવવામાં અડધી સદી જેટલો સમય લાગી શકે છે. છતાં, અંતે કોર્ટના નિર્ણયથી લાંબા સમયથી અટકેલા મિલકત વ્યવહારને પૂર્ણ થવાનો માર્ગ મોકળો થયો છે. કાનૂની નિષ્ણાતોના મત મુજબ, આ ચુકાદો વર્ષોથી પેન્ડિંગ રહેલા મિલકત વિવાદો અંગે કોર્ટના અભિગમને વધુ સ્પષ્ટ કરે છે.
